آه آه آه ياولدي قلبي عليك

[نسمةعبير]

 

السلام عليكم

هذي اول مشاركه لي في المنتدى

انا في حيره لايعلمها الا الله وياليت القى من يساعدني ويرشدني

رزقني الله بولد عمره الآن ثلاث سنوات وثلاثه شهور

ولادته طبيعيه ونموه طبيعي ولله الحمد ولكن لمن وصل سنتين لاحظت انه مايتكلم وتجيه اوقات يقعد يصارخ ويبكي


كنت الاحظ عليه كمان انه يحب يراقب المراوح وهذي من صفات اطفال التوحد لكنه في نفس الوقت يحب الناس

ويحب الخرجات والتماشي وكل الي حوله يحبونه يحب الالعاب الحركيه ويلعب مع الاطفال بس مو دايما


يحبني ويحب ابوه وكل الي حوله اذا ناديته يلتفت من اول مره واحيانا بعد اكثر من مره يحط عينه في عيني

مشكلته يقول كلمات غير مفهومه لكنه يقول الان ماما بابا اذا قلت راسي يأشر على راسه واذا قلت فمي يأشر عليه

اذا يبغى شي ياخذني من يدي ويوديني له شوي فيه حركه مايركز كثير يشد يدينه ينتبه للشي الي يحبه زي الاناشيد

الي في التلفزيون مافيه تعلق بلعبه معينه او اكل معين او لبس معين او حركه معينه سوى انه يحب يراقب المراوح ويحب

الانوار الكثيره


كنت خايفه ان يكون عنده توحد بسبب تاخر الكلام ومراقبته للمراوح

المهم وديته عند دكتورة اطفال وطالعت فيه وقالت ماعنده توحد المشكله تاخر في الكلام

مااقتنعت بكلامها ووديته عند دكتور نفسي وقال عنده فرط حركه وتشتت انتباه وهيه الي اخرت بنطقه وقال عنده

بعض من اعراض التوحد وقال نعطيه علاج يخليه يركز وينتبه ويستخدمه لين يوصل عمره عشرين سنه بصراحه خفت على

ولدي لان كان عمره سنتين ونص فمارضيت اعطيه علاج

سامحوني طولتها شويه بس اسمعوني للاخر

وديته قبل شهرين عند الدكتور **********استشاري مخ واعصاب في ************ بجده

والواضح من الدكتور انه فاهم وشاطر فعمل له تحاليل دم وطلعت النتيجه سليمه وعمل اختبار سمع وطلع سمعه كويس

ولله الحمد وعمل له اشعة الرنين المغناطيسي وطلع الدماغ سليم مئه في المئه الحمد لله بعد كذا عمل له تخطيط كهربائي

للمخ وطلع عنده شحنات شديده وواضحه وقال الدكتور ان هاذي الشحنات هيه الي ماخلته يتكلم ولا يركز ولا ينتبه

لانها تؤثر على المخ بالكامل واعطاه علاج اسمه ديباكين وقال لازم يستخدمه وراح يستخدمه لمدة سنتين

وقال كمان ان ولدي ماعنده توحد وانه مع العلاج راح يتحسن ويتكلم وانا الى الآن ماني شايفه تحسن عليه بس ملاحظه

ان حركته وشقاوته زادت

فانا ابغى اسال العارفين هل ولدي ماعنده توحد وهل مع العلاج راح يتحسن ويتكلم لان قلبي يتقطع عليه كل يوم

وهل ممكن يكون من الاطفال الي عندهم فرط الحركه وتشتت الانتباه بسبب زيادة الشحنات في المخ واذا دخلته مركز

لعلاج النطق راح يتحسن

ردو عليه الله لايحرمكم من غالي

وقولو ويش رايكم في كلام الدكتور